Адвокатите на Бајден ги испратиле документите до Националниот архив, кој го упати предметот до Министерството за правда поради нивната чувствителна природа
Американското Министерство за правда разгледува потенцијално доверливи документи од времето кога Џо Бајден беше потпретседател на САД, пронајдени во неговата поранешна канцеларија во невладина организација во Вашингтон, соопшти Белата куќа.
Адвокатскиот тим на Бајден во ноември открил околу десет досиеја документи во заклучен кабинет во „Пен Бајден Центарот“ во Вашингтон, рече негов адвокат посочувајќи дека тие се предадени на Националниот архив.
Адвокатите на Бајден ги испратиле документите до Националниот архив, кој го упати предметот до Министерството за правда поради нивната чувствителна природа.
„Белата куќа соработува со Националниот архив и Министерството за правда во врска со откривањето на, како што изгледа, административните записи на Обама-Бајден, вклучително и мал број документи со доверливи ознаки“,
се вели во соопштението на канцеларијата на советникот на Белата куќа.
Телевизијата „Си-би-ес њуз“ објави дека ФБИ е вклучено во истрага за доверливи документи пронајдени во невладината организација, а од американскиот државен обвинител Мерик Гарланд е побарано да ги разгледа документите.
Извор запознаен со ова прашање изјави за телевизијата дека серијата документи не содржат нуклеарни тајни, биле во папка во кутија со други некласифицирани документи, а не е наведен степенот на нивната класификација и доверливост.
Бајден, кој беше потпретседател на САД за време на мандатот на Барак Обама од 2009 до 2017 година, со 2020 имаше канцеларија во просториите на невладината организација, што се наоѓаат на околу еден километар од Белата куќа.
Извор: 360stepeni.mk
