Прилеп продолжува да биде меѓу лидерите во Македонија кога станува збор за селекција на отпадот. Според најновото истражување на „Пакомак“, дури 49 проценти од граѓаните на Прилеп селектираат отпад за рециклирање.
Ова го истакна градоначалникот на Општина Прилеп, Дејан Проданоски, кој посочи дека резултатот покажува оти селекцијата на отпадот сè повеќе станува дел од секојдневните навики на прилепските домаќинства.
„Селекцијата на отпад не е само прашање на систем и опрема. Таа започнува од секој дом, од секое семејство и од навиките што ги создаваме секој ден. Нашата обврска е да обезбедиме услови тие навики да се развиваат“, посочи Проданоски.
Дополнително, обезбедени се и 9 специјализирани возила за собирање отпад, од кои четири веќе се испорачани. Во тек е и набавката и поставувањето на 52 полуподземни контејнери на 21 локација, за инвестиција вредна над 17 милиони денари.
Во рамките на кампањата на ЈКП „Комуналец“ – „Чисто е убаво“, за само 60 дена во процесот на селекција се вклучиле уште 680 нови домаќинства, додека на граѓаните им биле испорачани 1.280 канти.
Проданоски нагласува дека инвестициите во опрема и инфраструктура се важни, но дека успехот на системот зависи и од активното учество на граѓаните.
„Ова се конкретни чекори за подобар и пофункционален систем. Но, секој систем има смисла само кога граѓаните го прифаќаат и го користат. Затоа продолжуваме заедно. Да селектираме, да се грижиме за градот и да создаваме подобри навики. Чист и зелен Прилеп го создаваме заедно“, порача градоначалникот Проданоски.
