Федералната управа за авијација (ФАА) објави дека авионот слетал безбедно откако екипажот пријавил проблеми со притисокот. Започната е истрага за инцидентот
Авион „боинг 737-9 макс“ на „Алјаска ерлајнс“ вчера принудно слетал во американската држава Орегон откако му испаднале еден прозорец и дел од трупот на височина од 5 000 метри, набргу по полетувањето.
Авиокомпанијата објави дека авионот со 174 патници и шест члена на екипажот слетал безбедно, пренесува Бета.
„Се случи инцидент на летот на авиокомпаниите на ‘Алјаска ерлајнс’ 1282 од Портланд во федералната држава Орегон до Онтарио во Калифорнија набргу по полетувањето“,
се наведува во соопштението од компанијата.
Авионот бил вратен кога се подигнал на 4 876 метри, шест минути по полетувањето.
Еден патник испратил снимка до локална телевизија на која е прикажана огромна дупка од страната на авионот кај патничките седишта.
Од „Алјаска ерлајнс“ соопштија дека поради претпазливост, ги приземјиле сите свои авиони „боинг 737-9“.
„По вечерашниот инцидент на летот 1282, решивме да преземеме чекор на претпазливост при привремено приземјување на нашата флота од 65 авиони ‘боинг 737-9’“,
се вели во соопштението на компанијата.
Федералната управа за авијација (ФАА) објави дека авионот слетал безбедно откако екипажот пријавил проблеми со притисокот. Започната е истрага за инцидентот.
Авионот „боинг 737-9 макс“ бил произведен и добил сертификат пред само два месеца, според податоците на ФАА.
Компанијата „Боинг“ соопшти дека е запозната со инцидентот, собира информации и е подготвена да даде поддршка во истрагата.
„Макс“ е најновата верзија на боинговите авиони 737, авиони со два мотора, кои често се користат на домашните авиолинии во САД. Во функција е од 2017 година.
Извор: 360stepeni.mk
