МОСКВА (АА) – Шефот на паравоената група „Вагнер“, Евгениј Пригожин, рече дека неговите борци биле на околу 200 километри од Москва кога решиле да се вратат за да избегнат крвопролевање, пренесува Анадолу.
Во изјавата на својот Телеграм, Пригожин рече дека руските власти сакале да ја распуштат неговата група и дека затоа „тргнале на марш на правдата“.
„Тргнавме на 23 јуни. За еден ден поминавме толкаво растојание што до Москва имаше само уште 200 километри. За ова време не пролеавме ниту една капка крв на нашите борци. Сега дојде моментот кога може да се пролее крв, затоа, сфаќајќи ја целата одговорност за тоа дека ќе биде пролеана руска крв на една од страните, ги вртиме колоните и се враќаме во теренските кампови според планот“, порача Пригожин во аудиопораката.
Белорускиот претседател Александар Лукашенко рече дека разговарал со Пригожин цел ден вчера, што довело до тоа Пригожин да се согласи за деескалација.
„Рускиот претседател Владимир Путин го извести својот белоруски колега за ситуацијата на југот на Русија со приватната воена компанија ‘Вагнер’. Шефовите на држави се договорија за заедничка акција. Како продолжение на договорот, претседателот на Белорусија, по дополнително разјаснување на ситуацијата преку сопствени канали, во координација со претседателот на Русија, одржа разговори со лидерот на ПВК ‘Вагнер’, Евгениј Пригожин“, се наведува од прес-службата на Лукашенко.
Како резултат на тоа, страните постигнаа „договор за недозволивоста на крвав масакр на територијата на Русија“.
„Евгениј Пригожин го прифати предлогот на белорускиот претседател Александар Лукашенко за запирање на движењето на вооружените припадници на ‘Вагнер’ на територијата на Русија и за понатамошни чекори за деескалација на тензиите“, се истакнува.
Во соопштението се додава дека „на маса е апсолутно поволно и прифатливо решение за ситуацијата, со безбедносни гаранции за борците на ‘Вагнер’“.
Извор: www.aa.com.tr
