Пригожин ја одбил понудата на Путин за интегрирање на членовите на „Вагнер“ во руската армија

Иако голем број на команданти на руската армија го поддржале планот за Евгениј Пригожин да командува со единица во армијата составена од платеници во „Вагнер“, сепак Пригожин одговорил негативно, со оправдување дека неговите платеници не се согласуваат со оваа одлука

Рускиот претседател Владимир Путин денеска за прв пат говореше за средбата со Евгениј Пригожин која се случила пет дена по неуспешниот пуч на приватната платеничка група “Вагнер”. Тој кажа дека му доставил понуда на Пригожин, тој и неговата армија да се приклучат на руската армија – понуда која била позитивно прифатена и од неговите команданти во армијата, но Пригожин експресно ја одбил понудата.

“Пригожин одговори на предлогот дека неговите момци не се согласуваат со таквата одлука, иако многу офицери на Вагнер кимнуваа со главите додека зборував за предлогот на состанокот”,

рече Путин.

Лидерот на „Вагнер“, Евгениј Пригожин и Владимир Путин оствариле средба пет дена по неуспешниот пуч

Членовите на „Вагнер“ сега обучуваат војници во Белорусија, каде што се од крајот на бунтот против руските сили на 24 јуни, соопшти денеска Министерството за одбрана во Минск. Министерството објави видео на кое наводно се гледа како припадници на „Вагнер“ тренираат белоруски војници на воен полигон во близина на градот Осиповичи, 90 километри југоисточно од главниот град Минск.

Путин воедно денеска кажа и дека приватната платеничка група „Вагнер“ законски не постои бидејќи во Русија нема закон за приватни воени организации, јавуваат руските медиуми.

„’Вагнер’ не постои. Не постои закон за приватни воени организации. Групата правно не постои“,

истакнал Путин за „Комерсант“.

Тој посочил и дека на руската влада и парламентот е да разговараат за правната рамка за приватните воени формации.

Путин: „Вагнер“ законски не постои

Инаку, за потсетување, за време бунтот во јуни, трупите на „Вагнер“ неколку часа окупираа руски воен штаб во јужна Русија и патуваа неколку стотици километри кон Москва. Бунтот заврши со договор кој предвидуваше заминување на Пригожин во Белорусија.

Путин им понуди на борците на Пригожин да им се придружат на редовните руски трупи, да одат во Белорусија или да се демобилизираат.