АНКАРА (АА) – Новиот претставник на Туркије во ОН, Седат Онал, ја истакна важноста на меѓународната помош за Туркије и Сирија по разорните земјотреси минатиот месец во кои загинаа над 45.000 луѓе, јавува Анадолу.
„Континуираната меѓународна поддршка, за Туркије и Сирија, вклучително и преку ОН, ќе биде од клучно значење“, рече Онал на состанокот на Советот за безбедност на ОН за Сирија.
„Турскиот и сирискиот народ се соочени со огромните последици од еден од најразорните земјотреси во историјата“, рече Онал.
„Туркије се обидува да исполни огромна задача за решавање на многу димензии, вклучувајќи катастрофа и итност, хуманитарна помош и закрепнување во област поголема од Швајцарија, Холандија и Данска заедно со околу 14 милиони жители“, рече тој.
„Додека се бориме со овие предизвици во нашата земја, продолжуваме да даваме сѐ од себе за да ја олесниме испораката на хуманитарна помош до сирискиот народ“, рече Онал.
„Веќе ги поправивме патиштата што водат до граничниот премин Баб ал-Хава, кои беа оштетени од земјотресот. Ги ставивме на располагање и граничните премини Баб ал-Салам и Баб ал Раи за побрз и поголем трансфер на помошта на ОН до најпогодените области каде таа е очајно потребна“, рече турскиот претставник.
„Откако двата земјотреси ги погодија двете земји, вкупно 456 камиони со помош ги преминаа граничните премини, доставувајќи основни средства за помош на милиони Сиријци“, рече тој.
„Одржувањето на зголемен одговор на ОН преку овие премини колку што е потребно ќе биде критично важно за на најбрз, ефективен и најефикасен начин да се задоволат потребите во Сирија“, додаде тој.
Бројот на загинати во разорните земјотреси што ја погодија Туркије се зголеми на 45.089, соопшти рано утринава турската Агенција за управување со катастрофи и вонредни состојби (АФАД).
На 6 февруари земјотреси со јачина од 7,7 и 7,6 степени по Рихтер погодија 11 турски области – Адана, Адијаман, Дијарбакир, Елазиг, Хатај, Газиантеп, Кахраманмарас, Килис, Малатја, Османије и Шанлиурфа.
Повеќе од 14 милиони луѓе во Туркије се погодени од земјотресите, како и многумина во северозападна Сирија.
Извор: www.aa.com.tr
