Претставник на Хамас за АА: „Не прифаќаме распоредување на странски сили во Газа“

БЕЈРУТ (АА) – ИДРИС ОКУДУЏУ –

Членот на Политичкото биро на движењето Хамас, Осама ал-Хамдан, изјави дека на Палестинците не им треба ничие туторство и дека не прифаќаат сместување на странски сили во Појасот Газа, јавува Анадолу.

Во разговор за Анадолу во Канцеларијата на Хамас во Бејрут, Хамдан рече дека најважната агенда меѓу Израел и Хамас е нова размена на затвореници и прекин на огнот.

„Добивме некои иницијативи од нашите браќа посредници како што се Катар и Египет (за размена на затвореници), но нашиот став е јасен, а тоа е целосно да ги запреме нападите. Коренот на проблемот се израелските напади врз Газа. Размената на затвореници е последица на овој проблем. Не е во ред да се навлегува во други детали без да се навлезе во суштината на проблемот, а нападите врз нашиот народ мора да престанат. Сите знаат дека сакаме размена на затвореници, тоа не е тајна. Меѓутоа, овој процес се одвива преку преговори и договори. Тоа не е можно додека непријателските напади сѐ уште траат“, нагласи Хамдан.

Во врска со наводите и разговорите за формирање нова администрација во Појасот Газа со посредство на некои земји, Хамдан додаде: „Хамас и Палестинците немаат потреба од ничие туторство и не го прифаќаат. Палестинскиот народ е тој што одлучува за природата на палестинската администрација и нејзините внатрешни работи. Палестинскиот народ не ги прифаќа оние кои се возат на израелски тенкови под покровителство на САД и се претставуваат како легитимни. Палестинскиот народ е тој што го создаде легитимитетот и денес знае на кој легитимитет мора да се потпре.“

Тој ги коментираше и наводите дека меѓународни воени сили, вклучително и од арапските држави, влегле во Појасот Газа.

„Доколку меѓународните сили сакаат да ја ослободат Палестина и да ја прекинат окупацијата, тие се добредојдени. Но, ако (израелската) окупација се замени со други сили, кој рече дека Палестинците сакаат да ја заменат ционистичката окупација со друга окупација?“, праша Хамдан и додаде:

„Оние кои зборуваат за Газа без Хамас се тие кои заклучуваат дека Израел ќе успее во својата воена авантура. Ние велиме дека нема да успее и дека се јасни манифестациите на неговиот неуспех во оваа авантура. Единствената точка во која Израелците успеаја беше убивањето на над 20 илјади луѓе, главно жени и деца, и уништувањето на инфраструктурата и канализациските системи.“

На веб страницата на Anadolu Agency (AA) објавена е само дел од содржината на вестите од Системот на проток на вести (HAS)..