Претседателот на Сојузот на синдикати на Македонија (ССМ), Слободан Трендафилов, денеска на социјалните мрежи упати сериозни обвинувања кон Медиумската информативна агенција (МИА) дека извршила цензура врз изјавите на синдикалните претставници дадени по седницата на Економско-социјалниот совет.
Трендафилов информира дека МИА во живо го пренесувала настанот, но преносот ненадејно бил прекинат, а видеото од преносот било избришано од официјалниот профил на агенцијата и сега не е достапно за јавноста. „Кој му нареди на раководството на МИА да цензурира, а патем заборави дека интернетот не работи по диктат!“, порача тој.
Во прилог на објавата, претседателот на ССМ сподели дел од избришаното видео и најави дека целосната изјава ќе биде објавена подоцна.
Овој случај отвори дискусии за транспарентноста и слободата на медиумите, а од МИА сè уште нема официјален став по обвинувањата.
ИЗВОР: racin.mk
