БОГОТА (АА) – Претседателот на Панама, Хозе Раул Мулино, ја отфрли заканата од новоизбраниот американски претседател Доналд Трамп дека ќе ја врати контролата врз Панамскиот Канал доколку не се намалат транзитните такси, особено за американските бродови, јавува Анадолу.
Мулино вчера во видеото што го објави на својот профил на социјалната мрежа X рече дека Каналот ѝ припаѓа на Панама.
„Како претседател, сакам точно да кажам дека секој квадратен метар од Панамскиот Канал и неговата соседна зона припаѓаат на Панама и ќе остане така. За суверенитетот и независноста на нашата земја не се преговара“.
Трамп во саботата ја обвини Панама дека наплатува „превисоки цени“ на американските бродови и побара од централноамериканската земја да ги намали таксите или да го врати Каналот под контрола на САД.
„Таксите што ги наплаќа Панама се смешни, особено ако се знае извонредната великодушност што ѝ беше дадена на Панама од САД“, вели Трамп и додаде дека тоа мора итно да престане.
Мулино рече дека таксите за користење на Каналот биле „утврдени јавно и на отворена расправа, земајќи ги предвид пазарните услови, меѓународната конкуренција, оперативните трошоци и потребите за одржување и модернизација на меѓуокеанската рута“.
Трамп, исто така, обвини дека Кина е вмешана во управувањето со Каналот.
„Каналот не е под директна или индиректна контрола, ниту од Кина, ниту од европската заедница, од САД или од која било друга сила“, рече Мулино, без да го спомене Трамп. „Како Панама, силно ја отфрлам секоја изјава која ја искривува оваа реалност“.
Шефот на панамската држава рече дека „Панама ги почитува другите земји и бара почит“ и дека се надева дека со новата американска Влада „ќе ги зачува и одржува односите со почит“.
Мулино рече дека безбедносните прашања како што се илегалната миграција, трговијата со дрога, тероризмот и организираниот криминал мора да бидат приоритет на билатералната агенда. Илјадници нерегуларни мигранти секоја година патуваат низ џунглата Дариен во Панама на пат кон САД.
Колумбискиот претседател Густаво Петро реагираше на пораката со одбрана на централноамериканската земја. Петро во пораката на Х рече дека ќе биде „на страната на Панама и одбраната на нејзиниот суверенитет до последните последици“.
„Доколку новата американска Влада сака да разговара за бизнис, ние ќе разговараме, лице в лице, за доброто на нашиот народ, но за достоинството никогаш нема да се преговара“, напиша Петро на својот профил на X.
Панамскиот Канал, завршен од САД во 1914 година, беше вратен на Панама според договорот од 1977 година потпишан од американскиот претседател Џими Картер.
Панама ја врати целосната контрола над комерцијалниот премин на 31 декември 1999 година.
Извор: Anadolu Agency (AA)
