Претседателката на Антикорупциска комисија Татјана Димитровска по жестоките реакции во јавноста изминативе денови поднесе оставка. Ваквата одлука на Димитровска за заминување од позицијата прв антикорупционер доаѓа една недела откако Јавното Обвинителство отвори обвинение против неа. Од кабинетот на претседателот на Собранието Африм Гаши потврдија дека оставката е веќе пристигната и дека ќе се постапи согласно процедурите.
-Кабинетот на претседателот на Собранието ја информира јавноста дека претседателката на Државната комисија за спречување на корупцијата Татјана Димитровска, денес до претседателот на Собранието Африм Гаши, поднесе оставка од нејзината функција. Истовремено, ве информираме дека Собранието ќе постапи согласно предвидените процедури, изјави од кабинетот на претседателот на Собранието, Африм Гаши.
Бидејќи се работи за оставка, натамошната процедура е Собранието на една од наредните седници само да го констатира престанокот на мандатот без никаква дебата, а потоа ќе почне постапка за избор на нов претседател. Во кусото известување Димитровска не навела причина за оставката, туку само се повикува на Законот за спречување на корупцијата член 14 став 1, алинеја 1.
„На претседателот односно членот на Државната комисија му престанува функцијата пред истекот на мандатот ако поднесе оставка“, се вели во законот за спречување на корупција.
Сепак одлуката Димитровска ја носи по острите реакции во јавноста во кој се бараше Собранието да покрене иницијатива и да ја разреши, но претседателот на Собранието Гаши во понеделникот изјави дека нема законска можност за нејзино разрешување бидејќи за тоа е потребно правосилна судска пресуда. Против Димитровска е покренато обвинение по два основа поради што судот одреди мерка забрана за вршење дејност.
Таа е обвинета за поврзаност со предметот „Адитив“ бидејќи одавала службени тајни, односно од својот телефон преку вибер и ватсап пренесувала податоци за поведени постапки за обвинет од овој предмет. Дополнително се терети и за незаконско стекнување државен безбедносен сертификат бидејќи го добила откако тестот за неа го положил ревизор а не таа самата.
ИЗВОР: ТВ 21
