Пресуда за пожарот во модуларната болница во Тетово: Директорите добија условна казна од една и пол година, докторот Вучевски е ослободен

Ослободителна пресуда судот донесе за докторот Бобан Вучевски кој се товареше за делото непостапување по здравствени прописи. Заедно со Вучевски, и Клиничката болница е ослободена за делото непостапување по здравствени прописи. На Клиничката болница ѝ е изречена парична казна од еден милион денари

Тетовскиот суд денеска ја изрече пресудата за пожарот во модуларната болница во кој на 8 септември 2021 година изгореа 14 луѓе. Обвинетите директори Флорин Бесими и Артан Етеми и правното лице Клиничка болница Тетово за кривичното дело тешки дела против општата сигурност добија казна од една година и шест месеци, со услов во наредните три години да не го повторат делото.

Ослободителна пресуда судот донесе за докторот Бобан Вучевски кој се товареше за делото непостапување по здравствени прописи. Заедно со Вучевски, и Клиничката болница е ослободена за делото непостапување по здравствени прописи.

На Клиничката болница ѝ е изречена парична казна од еден милион денари.

Поранешните директори на болницата Бесими и Етеми се гонеа бидејќи не ставиле пропишани уреди за гаснење на пожар. На докторот Вучевски, пак, му се судеше бидејќи дозволил влез на роднини во болничките соби, иако тоа било забрането.

Судењето за пожарот во тетовската модуларна болница кој се случи на 8 септември 2021 г., кога животите ги загубија 14 луѓе, а десетина беа повредени, почна на 7 декември лани откако од септември 2022 дотогаш судскиот процес беше неколкупати одложуван.

Обвинетите, директорите Фљорин Бесими и Артан Етеми, докторот Бобан Вучевски и претставник на Клиничката болница Тетово како правно лице, на почетокот на судењето истакнаа дека го разбираат обвинението, но не признаваат вина и рекоа дека не ги сториле делата за кои се товарат.

Во октомври 2021 по вештачењето на МВР, Обвинителството информираше дека пожарот во модуларната настанал како последица на запален продолжен кабел, на кој бил приклучен дефибрилатор-апарат за реанимација, полнач за мобилен телефон и уште еден уред.

Тогашните двајца директори на тетовската болница поднесоа оставки, но останаа на функциите се до преструктуирањето на Владата.