Престојот во природа, прошетките во шумата,
градинарството, вклучувањето во активности на отворено, прошетките меѓу дрвјата
со црцорење птици… се само некои од активностите што се сметаат за терапија за
телото и умот. Со илјадници години, луѓето ја сметале својата врска со
природата за главен столб на здравјето. Сега оваа вековна мудрост добива
поддржувачи во светот на модерната медицина.
На што влијае
престојот во природа?
Во текот на изминатите 10 години, се акумулираат научни
докази што покажуваат дека престојот во природа може да помогне во лекувањето
на многу здравствени проблеми и кај возрасните и кај децата.
– Поминувањето од 20 до 30 минути во природа значително
ги намалува стапките на депресија, ги намалува нивоата на хормонот на стрес
кортизол во крвта, крвниот притисок и срцевиот ритам и ја стимулира меморијата
и креативноста. Контактот со природата е еден од ретките клинички пристапи што
нема негативни ефекти, објаснува д-р Клодел Петрин-Дезориер, клинички предавач
на Одделот за семејна медицина и итна медицина на Универзитетот во Монтреал и
семеен лекар на CLSC de Hochelaga-Maisonneuve.
Всушност, придобивките од природата за физичкото и
менталното здравје се толку големи што „рецептите за престој во природа“ сега
се дел од арсеналот на многу здравствени работници. Препорачаната доза, според
нив, е да се поминат минимум два часа неделно опкружени со зеленило, 20 минути
или повеќе одеднаш, во еден ден.
Не е доволно
само да се биде во природа, важно е да се подигне свеста кај луѓето за
лековитата моќ на природната средина
Prescri-Nature, на пример, е првата програма за рецепти
за природни лекови во Квебек, започната во 2022 година со голема помпа и
поддршка од организации што претставуваат повеќе од 45.000 здравствени
работници во покраината. Целите на програмата Prescri-Nature се двојни – да се
подигне свеста за здравствените придобивки од природата и да им се обезбедат на
здравствените работници сигурни совети и ресурси за подобрување на нивното
знаење.
– Програмата има за цел да ги направи рецептите за
природата формален медицински чин, како рецептите за лекови. Познат факт е дека
давањето на пациент лист хартија потпишан од здравствен работник ќе има поголем
ефект од усниот совет – нагласува семејниот лекар д-р Петрин-Дезориер.
Секој по свој
вкус, прилагоден на неговите потреби
Кога станува збор за пишување рецепти, важно е да се
избегне пристап „една големина за сите“. За да го прилагоди рецептот, д-р
Петрин-Дезориер одвојува време да разговара за омилените активности на секој
пациент, колку време поминуваат на отворено и нивниот однос со природата.
– За оние кои не излегуваат многу од дома и водат
релативно седентарен начин на живот, поминувањето два часа неделно во прошетка
во шума може да изгледа како тешка задача. Заедно, утврдуваме што можат да
прават во парк во близина на нивниот дом. Секој, вклучително и оние што живеат
во градовите, а особено во неповолните подрачја, мора да има пристап до
висококвалитетни природни простори богати со биодиверзитет во близина на
нивните домови – нагласува д-р Петрин-Дестрозиер.
Од медицинска гледна точка, Prescri-Nature се вклопува во
низа социјални рецепти во медицината. По спиењето, физичката активност и
престанокот со пушење, контактот со природата е четвртиот столб на доброто
здравје.
– Револуцијата е тука. Еве нешто што е во наш дофат,
корисно за нашето физичко и ментално здравје и добро за планетата. Докажано е
дека луѓето што поминуваат повеќе време во природа имаат поголема веројатност
да ја заштитат – нагласува д-р Петрин-Дестрозиер.
Извор: vecer.mk
