ГАЗА (АА) – Палестинските власти издадоа предупредување дека бројните трупови на улиците во северниот дел на Појасот Газа, каде Израел продолжува со интензивните напади, може да доведат до еколошка катастрофа, известува Анадолу.
Мухамед Афес, шеф на Канцеларијата за медицинска помош во Газа, изјави дека има многу недостапни тела на улиците во северниот дел на Појасот Газа.
„Оваа ситуација може да доведе до голема еколошка катастрофа“, изјави Афес.
Тој нагласи дека е недоволен бројот на медицински персонал и медицински материјали во Газа.
Афес предупреди дека Израел продолжува да ги таргетира болниците и медицинските тимови и дека лекарите не можат да даваат услуги во северниот дел на Газа, потенцирајќи дека нема повеќе хирурзи кои би ги вршеле критичните операции на тешко повредените луѓе.
Тој посочи дека Светската здравствена организација (СЗО) обезбедила многу мала количина гориво и медицински материјали за регионот.
Во октомври 2023 година, Израел започна геноцидна војна во Појасот Газа, во која досега се убиени повеќе од 44.900 луѓе, главно жени и деца.
На 21 ноември, Меѓународниот кривичен суд издаде налози за приведување на израелскиот премиер Бенјамин Нетанјаху и поранешниот министер за одбрана Јоав Галант за воени злосторства и злосторства против човештвото во Газа.
Израел е обвинет за геноцид пред Меѓународниот суд на правдата поради војната во Појасот Газа.
Извор: Anadolu Agency (AA)
