Вечерва, во Битола, дворот на ООУ „Гоце Делчев“ беше исполнет со празнична атмосфера, каде што голем број ученици, родители и граѓани присуствуваа на новогодишниот училишен базар. Настанот привлече внимание како еден од најубавите училишни базари во градот, носејќи радост и предновогодишно расположение.
Посетителите уживаа во богата понуда на вкусни закуски и топли напитоци, додека музиката, песните и огнот во училишниот двор создадоа топла и пријатна атмосфера. Базарот беше место за дружење, забава и заедништво, каде што празничниот дух беше присутен насекаде.
Задоволство од успешната реализација на настанот изрази директорката на училиштето, Наташа Ставревска, која им се заблагодари на сите вклучени во организацијата.
„Браво за сите вредни ученици, наставници и родители кои со својот труд и заедништво ја разубавија оваа предновогодишна приказна. Горди сме на постигнатото“, изјави Ставревска.
Новогодишниот базар уште еднаш потврди дека Битола знае да создаде топла празнична атмосфера и да ги обедини граѓаните околу убави и позитивни настани.
ФОТО: Апла.мк
