Сојузот за младинска работа (СМР) по втор пат го распиша јавниот повик за доделување на стипендијата „Билјана Василевска Трајкоска“ за последипломски академски студии по младинска работа на Филозофскиот факултет при Универзитетот „Св. Кирил и Методиј“.
Стипендијата е востановена и се доделува во чест на Билјана Василевска Трајкоска – Биле, истакната активистка и лидерка во областа на младинската работа, чија визија, посветеност и незапирлива енергија оставија длабока трага во развојот и професионализацијата на младинската работа во нашата држава.
Како дел од својата мисија да ја издигне младинската работа на национално ниво, Сoјузот за младинска работа преку оваа стипендија го почитува наследството на Билјана и ги поддржува идните генерации младински работници кои ќе го следат нејзиниот пример.
Стипендијата претставува можност за сите заинтересирани лица кои се заинтересирани или планираат да се запишат на последипломските академски студии по младинска работа и ги исполнуваат критериумите за упис на студиската програма која се спроведува на Филозофскиот факултет при Универзитетот „Св. Кирил и Методиј“, Скопје.
Краен рок за доставување на документацијата е 15 септември 2025 година, понеделник (до 23:59 часот).
Повикот со сите детали и онлајн формулари потребни за аплицирање е достапен на овој линк.
За дополнителни информации поврзани со повикот: [email protected]
Со доделување на оваа стипендија, СМР испраќа порака дека младинската работа е важна, а младинските работници заслужуваат поддршка и признание! Тоа е најдобриот начин да се зачува и пренесе визијата на Биле.
Извор: kurir.mk
