Жителите на Карпош 4 веќе втора недела се соочуваат со поплавена улица „Никола Парапунов“ поради дефект на главната водоводна цевка. Водата постојано истекува, поплавувајќи улици и влегувајќи во отпадните шахти, со што се губат големи количества питка вода.
„Скоро десетина дена е вака, ова веќе не се трпи. Има ли некој да работи овде?“ изјави еден од жителите, додека друг додаде: „Нонстоп тече вода, а реакции од Водовод нема.“
Дефектот е лоциран на затворачот на главниот цевковод, кој снабдува две третини од Скопје, вклучувајќи ги и болниците. Од Водовод за Телма велат дека ваков проблем се случува ретко, еднаш во половина век, и предупредуваат дека при поправката многу домаќинства ќе останат без вода.
За жал до објавата на овој текст од ова претпријатие редакцијата на Рацин.мк не доби одговор кои се плановите за санација иако според информациите на Телма техничките оперативни планови за санација биле готови, а деталите за почетокот на работите ќе се објавеле најдоцна за време на викендот. Во меѓувреме, на улицата се поставени знаци за пренасочување на сообраќајот.
ИЗВОР: racin.mk
