Единствената македонска компанија од одбранбената индустрија, АТС Груп, потпиша меморандум за соработка со МКЕ – најголемата државна компанија од одбранбената индустрија на Туркије, пренесува Анадолу.
На потпишувањето на меморандумот присуствуваа високи претставници на владите на двете земји.
Меморандумот за соработка го потпишаа генералниот директор на МКЕ, Илхами Келеш, и сопственикот и извршен директор на АТС Груп, Шефшет Демировски, кои посочија дека со оваа соработка ќе се поттикнат активностите на двете компании и ќе се зголеми нивното присуство на меѓународниот пазар, особено во Туркије и Северна Македонија.
Соработката вклучува трансфер на технологија, техничко знаење и експертиза за производството и подобрување на производствените капацитети, модернизација на производните линии, подобрување на извозните можности, заеднички истражувања за зголемување на извозниот потенцијал на меѓународните пазари, обука и техничка помош, развој на програми за обука и подобрување на техничката експертиза.
Меморандумот опфаќа и заедничко вложување и отворање нова фабрика за производство на барут во Северна Македонија со заеднички инвестиции.
На потпишувањето присуствуваа министерот за одбрана на Северна Македонија, Владо Мисајловски, министерот за надворешни работи и надворешна трговија, Тимчо Муцунски, и заменик-министерот за национална одбрана на Туркије, Муса Хејбет.
Тие го поздравија и искажаа задоволство од потпишувањето на меморандумот за кој е нагласено дека е стратешки чекор кој дополнително ќе ги зајакне односите на двете сојузнички и пријателски земји.
Извор: Anadolu Agency (AA)
