Најголемата фабрика на „Хајнекен“ во Франција во близина на градот Лил беше евакуирана денес поради истекување на амонијак, соопштија префектурните власти и противпожарната служба, објавија француските медиуми.
Точната причина за истекувањето не е пронајдена, но како што изјавија локалните власти, нивото на амонијак во воздухот, кое беше измерено во и надвор од фабриката, не претставува опасност за локалното население, објави „Ле Фигаро“.
Според портпаролот на Противпожарната и спасувачка служба (SDIS), пријавено е истекување на амонијак во делот од фабриката каде што моментално се изведуваат градежни работи, иако точната локација на изворот на истекувањето не е утврдена.
На местото на настанот беа испратени 25 противпожарни возила, а над 300 вработени беа евакуирани како мерка на претпазливост.
Фабриката во близина на Лил е најголемиот објект на Хајнекен во Франција, и по површина и по обем на производство.
ИЗВОР: ТВ 21
