Катастрофалните поплави предизвикани од силното невреме кое ја зафати Словенија предизвикаа смрт на најмалку шест лица, додека, пак, материјалните штети се очекува да достигнат неколку милијарди евра, изјави словенечкиот премиер Роберт Голоб
Илјадници словенечки граѓани се евакуирани од нивните домови низ северозападна и централна Словенија, а армијата, пожарникарите и спасувачите се обидуваат да ослободат други и да ги расчистат улиците. Поројните дождови со денови паѓаа во речиси две третини од земјата, уништувајќи згради и мостови.
“Штетата ќе изнесува неколку милијарди евра, за ефикасна санација ќе биде потребно „да се направи сè и да се струга секаде каде што е можно“ и да се добијат што повеќе средства од европските фондови и помош од странство“,
рече премиерот Голоб.
Словенечката агенција за животна средина објави дека поплавите вчера почнале да се повлекуваат, но некои области сѐ уште се отсечени. Европската Унија понуди тешки машини и инженерски единици. Словенија, исто така, побара хеликоптери, војници и монтажни мостови од воената алијанса на НАТО. Хрватска и Унгарија помогнаа со хеликоптери, а Германија со тим за цивилна заштита.
Помош за Словенија најави и С Македонија, а шефот на државата Пендаровски во разговор со словенечката претседателка Наташа Пирц-Мусар изразил жалење и сочувство до Словенија и сите нејзини жители за загубите и штетите претрпени во поплавите и искажа подготвеност за помош.
„Словенија е голем пријател на Северна Македонија, дом на многу наши сограѓани, наш сојузник во НАТО, држава со која соработуваме во повеќе процеси и иницијативи, а целиме да имаме и заедничка иднина во рамки на ЕУ. Македонското општество се сеќава на помошта која Словенија ни ја дала во минатото при справување со природни непогоди и ние сме подготвени да помогнеме согласно искажаните потреби од словенечката страна во рамки на нашите можности“,
се наведува во соопштението од кабинетот на претседателот Пендаровски.
ИЗВОР: 360stepeni.mk
