Судскиот процес против петмина мажи обвинети за негрижа што предизвика смрт на 135 луѓе на фудбалски стадион во градот Маланга, почна денеска во индонезискиот суд.
Трагедијата се случи на 1. октомври лани, на истокот на островот Јава, откако полицијата употреби солзавец кога навивачи го преплавија теренот по поразот на домашниот тим Арем од екипата Персебаја од градот Сурабаја.
Во стампедото предизвикано од солзавецот, настрадаа 135 луѓе, меѓу кои и повеќе од 40 деца.
Истражниот тим што го формираше индонезискиот претседател Џоко Видодо, како реакција на гневот во јавноста, утврди дека полицијата немала сознание дека користењето солзавец на фудбалските стадиони е забрането, како и дека „неселективно“ го користела на теренот, трибините и надвор од стадионот, што предизвикало стампедо на повеќе од 42.000 луѓе.
Обвинети се тројца полициски службеници, кои дозволиле или наредиле да се употреби солзавец, претседателот на организацискиот одбор на Арем и шефот на обезбедување на стадионот.
Доколку бидат прогласени за виновни им се заканува казна затвор до пет години. (МИА)
ИЗВОР: kurir.mk
