Актерката се прослави со филмовите „Фантастично патување“ и „Милион години пред нашата ера“. „Плејбој“ ја прогласи за трета најсекси ѕвезда на 20. век, а на слична листа се најде и во списанието „Емпајр“
Легендата на Холивуд, актерката Ракел Велч, почина денеска на 82-годишна возраст.
Таа важела за секс-симбол на 60-тите и 70-тите години на минатиот век, а се прослави со улогите во филмовите „Фантастично патување“ и „Милион години пред нашата ера“. Зад себе остави остварувања на 40-ина улоги на филмските платна и уште толку во телевизиски серии и филмови.
Двапати беше номинирана за „Златен глобус“, а ја доби наградата за најдобра улога во мјузикл/комедија за нејзината изведба во „Тројцата мускетари“ во 1975 година.
Од списанието „Емпајр“ во 1995 година беше прогласена за една од 100-те најсекси ѕвезди во филмската историја. „Плејбој“, пак, ја рангираше на третото место на нивната листа од 100 најсекси ѕвезди на 20. век.
Меѓу последните улоги кои ги имаше, беа во серијата „Дејт мај дед“, како и во филмот „Како да се биде латински љубовник“, снимени во 2017 година.
Во приватниот живот, пак, Велч имаше четири брака. Првиот со нејзиното момче од средно училиште, со кого се омажи во 1959 година и со кого доби две деца. Двојката се разведе во 1964, а потоа актерката имаше уште три брака.
Извор: 360stepeni.mk
