Биркин била пронајдена мртва во нејзиниот дом во Париз. Имаше 76 години
Многумина можеби и не знаат за која песна станува збор кога ќе го прочитаат само името “Je T’aime…moi non plus”, но често се доволни само првите тонови за да се препознае една од меѓународно најпознатите француски песни на сите времиња. Џејн Биркин беше женскиот глас во дуетот со нејзиниот тогашен партнер Серж Гејнсбург, а песната ги предизвика тогашните табуа и граници за тоа – до каде може да се оди во претставувањето на љубовта и страста во едно музичко дело.
Во својата актерско-музичка-модна кариера, Биркин беше инспирација за женската ташна на Хермес, наречена по нејзе „Биркин“. Ташната е популарна и ден денеска.
Биркин е родена во Лондон во 1946 година. Слава стекнува пеејќи на француски, особено со хитот “Je t’aime… moi non plus”, која ја пее во дует со Серж Гејнсбург. Гејнсбург, во тој момент е партнер на Биркин, но песната е напишана за неговата бивша – познатата Брижит Бардо. Дуетот бил снимен во 1968 година. Веднаш е забранет за емитување на радио во повеќе земји, а песната ја осудил и Ватикан поради сексуалноста на текстот. Но, двојката добива слава и допира до нова меѓународна публика.
Биркин и Гејнсбург ќе останат партнери 12 години. По разделбата, нема да го прекинат пријателството. Гејнсбург, кој бил 18 години постар од неа, ќе продолжи да пишува песни за Биркин долго по разделбата. Двојката има ќерка, познатата глумица и пејачка Шарлот Гејнсбург.
По разделбата со Гејнсбург, Биркин работи и како актерка и како пејачка. Објавува повеќе соло албуми а се појавува и во независни филмови.
Од 70-тите години на минатиот век, Биркин живееше во Франција. Освен на Шарлот Гејнсбург, таа е мајка на фотографката Кејт Бери (од првиот брак, со композиторот Џон Бери) и на музичарката Лу Дојон (од врската со режисерот Жак Дојон).
„Не знам колку беше лесно за децата да имаат мајка чии голи фотографии се појавуваа во списанија и татко кој гореше банкноти од 500 франци. Се надевам дека барем едно од нив, постапи исправно за некои работи“,
има изјавено Џејн Биркин за Тајмс, за времето поминато со Серж Гејнсбург.
Во септември 2021 година, француските медиуми јавија дека Биркин закрепнува по претрпен мозочен удар.
Денеска, Биркин била пронајдена почината во нејзиниот дом.
Извор: 360stepeni.mk
