Сојузот на синдикати на Македонија денеска не забележа поголемо зголемување на цените во маркетите. Во контролата што ја направија вработените во Сојузот, било констатирано дека производите кои влегуваат во минималната синдикална кошница не се зголемени, односно имало незначително зголемување кои би ја зголемиле кошницата од 30 до 40 денари.
„За среќа на граѓаните и на работниците се уште нема некои драстични зголемувања на цените, односно вредноста на синдикалната минимална кошница за делот за храна и пијалаци е зголемена за некои 30 – тина, 40 – тина денари што укажува дека или трговците ќе бидат фер кон граѓаните и кон работниците и нема да ги зголемат неоправдано цените или се уште не стигнале да направат промени земајќи во предвид дека ова е првиот работен ден после 1.мај кога за среќа, во трговијата работниците не работат на празник.“, вели Слободан Трендафилов
Трендафилов очекува да продолжи ваквиот тренд па дури и да се намалат цените.
Инаку, според веб страницата www.cenometar.mk во периодот 24 април 2 мај, цените на некои производи драстично пораснале, а на некои се намалиле. Во одредени маркети, цената на килограм говедско месо се зголемила за 19 насто, но, затоа пак има пад на цената на пилешкото месо. Во некои маркети најголем пораст на цените има прашокот за перење и тоа 60 насто, но пак има намалување на течниот детергент. Кај зеленчукот поскапеле доматите, а се поевтиниле краставиците, а кај овошјето пониски цени има кај портокалите. Од млечните производи поскапел кашкавалот, а затоа поевтинил јогуртот.
Премиерот Христијан Мицкоски најави дека ќе ја следат ситуацијата и нема да дозволат дивеење на цените. Дадени се насоки до Министерството за економија и до Државниот пазарен инспекторат да вршат контроли на терен.
„Лично разговарав со министерот и со директорот на Пазарниот инспекторат за засилена контрола не само кај трговците туку и кај дистрибутерите и производителите. Да видиме да не има некои при влезните фактури исто така трикови, не само кај оние што ги продаваат на своите рафтови, во своите дуќани.“, вели Христијан Мицкоски.
Мицкоски додаде дека нема да дозволат никој од учесниците во трговијата да се служи со трикови, на штета на граѓаните.
ИЗВОР: ТВ 21
