Претседателот на одборот за одбрана на британскиот парламент, Тан Деси од Лабуристичката партија, денеска изјави дека заканите од аргентинскиот претседател Хавиер Милеј во врска со Фолкландските Острови ја истакнуваат потребата Велика Британија да ги зголеми своите трошоци за одбрана.
Деси рече дека британската влада треба да ги зголеми трошоците за одбрана на три проценти од бруто домашниот производ (БДП) до 2030 година, објави Гардијан.
„Важно е премиерот Енди Бернам и министерот за финансии да не ги одложуваат овие одлуки до следната година“, рече Деси.
Тој рече дека заканите од Аргентина дополнително ја истакнуваат потребата Велика Британија да биде подготвена да ги заштити Фолкландските Острови.
Порано оваа недела, во среда, Деси го праша премиерот дали ја поддржува целта трошоците за одбрана да достигнат три проценти од БДП до 2030 година.
Бернам тогаш изјави дека ја презел обврската, но кабинетот на премиерот подоцна соопшти дека не е преземена цврста обврска за исполнување на целта од три проценти до 2030 година.
Наместо тоа, британската влада се обврза на долгорочната цел на НАТО за трошење 3,5 проценти од БДП за одбрана до 2035 година, потсетува лондонскиот весник.
Деси рече дека сè уште има недостаток на јасност во врска со британската одбранбена политика и дека затоа неговото прашање во парламентот е оправдано.
Оваа недела, аргентинскиот претседател Хавиер Милај го повтори ставот на неговата земја за Фолкландските Острови, кои Аргентина ги нарекува Малвински Острови.
Во меѓувреме, американскиот претседател Доналд Трамп ја доведе во прашање американската поддршка за британскиот суверенитет над островите.
Трамп изјави за GB News дека Обединетото Кралство не ги поддржало САД за време на војната во Иран и посочи на зависноста на Велика Британија од нафтата што минува низ Ормутскиот теснец.
Извор: vecer.mk
