По 35 години се отвора граничен премин меѓу Турција-Ерменија за достава на хуманитарна помош

Овој граничен премин последен пат функционирал во 1988 година за иста намена, кога земјотрес со јачина од 6,8 степени ја погодил Ерменија, а животот го загубиле повеќе од 25 000 Ерменци

Откако Турција беше погодена од земјотресот опишан како „катастрофа на векот“, продолжува да се доставува помош од целиот свет, но и од соседните земји. Интересен е фактот што денеска по 35 години беше отворен граничниот премин „Аликан“ во регионот на Игдир.

Како што пишуваат турските медиуми, овој граничен премин последен пат функционирал во 1988 година за иста намена, кога земјотрес со јачина од 6,8 степени ја погодил Ерменија, а животот го загубиле повеќе од 25 000 Ерменци.

Сердар Килич, специјален претставник на Турција за дијалог со Ерменија, на Твитер објави дека утринава од граничниот премин „Аликан“ во Турција пристигнале пет камиони со помош, вклучувајќи лекови, храна и вода.

„Веднаш по земјотресот, покрај тимот за пребарување и спасување од 28 лица и техничка опрема, за Адијаман замина и пакетот итна помош од ерменскиот народ, вклучувајќи 5 камиони од 100 тони храна, лекови и вода“.

напиша тој.