Елена Петрова, директорката на Управата за јавни приходи (УЈП), во разговор за ТВ21 вели дека наплата на долговите од „црната листа“ на должници е побавна бидејќи често се случува должниците да преземат мерки како оттуѓување или ставање на имот под залог за да го избегнат процесот на присилна наплата.
„Кога се соочуваме со долгови на даночни обврзници, прво проверуваме дали фирмите се сè уште активни и дали поседуваат имот од кој може да се наплати долгот. Ако утврдиме дека нема основа за наплата или дека се извршени намерни активности за избегнување на плаќањето, таквите случаи ќе бидат санкционирани. Но, ситуацијата се усложнува кога даночните обврзници, наместо соработка, влегуваат во конфликт со УЈП. Во такви случаи, често го оттуѓуваат имотот или го даваат под залог, што дополнително ја отежнува наплатата,“ објасни Петрова.
Таа додаде дека времето е значаен фактор. „Колку е постар долгот, толку е помала веројатноста за негова наплата,“ нагласи директорката.
УЈП останува посветена на унапредување на процесите за детекција и управување со даночните долгови, но предизвиците со намерно избегнување на обврските и сложеноста на случаите често го забавуваат процесот.
ИЗВОР: racin.mk
