Петр Павел победи на претседателските избори во Чешка

Не гледам победници или губитници во оваа земја. Победија вредностите како вистината, достоинството, почитта. Убеден сум дека ја сакаме Чешка во која владее доброто расположение, рече Павел

По пребројувањето на гласовите од 99 отсто од избирачките места, генералот Петр Павел освоил 58,12 отсто од гласовите, додека противникот, поранешниот популистички премиер, сега лидер на опозицијата, петтиот најбогат тајкун во Чешка, Андреј Бабиш (68), освоил 41,87 отсто од гласовите, а излезноста достигнала речиси 70 отсто од 8,25 милиони регистрирани гласачи.

Идниот нов претседател на Чешка, пензионираниот генерал Петр Павел (61), апелираше Чесите да не се чувствуваат поразени доколку не гласале за него, бидејќи имал намера да разговара со сите кои имаат идеи и решенија, а дека победиле демократските и граѓански освоени вредности.

„Знам дека многумина се разочарани затоа што нивниот кандидат не победи. Не гледам победници или губитници во оваа земја. Победија вредностите како вистината, достоинството, почитта. Убеден сум дека ја сакаме Чешка во која владее доброто расположение“,

рече Павел на прес-конференцијата.

Според него нема победнички и поразени гласачи.

„Сите ние сме граѓани на Чешка. И гласачите на Андреј Бабиш сакаат државата да функционира и да им помогне“,

рече генералот Павел во првите реакции за победата.

Петр Павел ќе положи заклетва на 9 март.

Чешкиот премиер Петр Фијала денеска им честиташе на Чесите што го избраа пензионираниот генерал, поранешен началник на Генералштабот, а подоцна и втор човек на НАТО, Петр Павел за нов претседател на земјата.

„Победи граѓанскиот кандидат и вредностите што тој ги застапува, а тоа е многу важна вест во овие меѓународно и економски тешки времиња. Зад нас е најодвратната изборна кампања во поновата историја. Општеството од неа излегува поделено. Добро е што во претседателскиот дворец Храдчани ќе биде претседател кој сака да обединува“,

рече премиерот Фијала.

Чешкиот премиер оцени дека денешниот пораз на изборите за претседател на Чешка заедно со поразот на парламентарните избори за поранешниот популистички премиер, петтиот најбогат тајкун во Чешка, Андреј Бабиш, може да значат крај на неговата популистичка ера.

Андреј Бабиш му ја честиташе победата на генералот Павел, го призна поразот и му посака да биде сечиј претседател, да ги слуша нивните проблеми и да се бори за чешките национални интереси.

„Би ги замолил нашите поддржувачи да прифатат дека сум поразен и да прифатат дека имаме нов претседател“,

изјави Андреј Бабиш.

Петр Павел добива силен мандат од чешките гласачи, бидејќи според прогнозите освоил повеќе гласови од неговиот претходник, претседателот во заминување Милош Земан.