Пред неколку дена, општинскиот комитет на ВМРО-ДПМНЕ во Пробиштип, преку својот Фејсбук профил, објави дека на локалитетот Пешка крај Злетовска Река се забележува недоволно тековно одржување и упати на неостварените предизборни ветување на актуелниот градоначалник. До моментот на објавување на текстов, од Општина Пробиштип и градоначалникот Драган Анастасов не е објавен официјален одговор во врска со наводите.
Според објавата и приложените фотографии, на делови од приодите и скалите се гледаат оштетувања, како и отпад долж пристапните патеки, а се забележува и делумно оштетена дрвена платформа во близина на речното корито. Во објавата се наведува дека ваквите состојби упатуваат на потреба од санација, редовно чистење и усогласување на урбаната опрема.
Во изборните програми на градоначалникот Анастасов, кој го привршува својот втор последователен мандат, Пешка е наведена како локација за реконструкција и одржување, со најави за проширувања и доизградба на пристапен мост до другото речно корито, како и неколку летниковци. Во моментов не се јавно достапни прецизни податоци за фазата на реализација и буџетската динамика зад процесот.
Локалитетот Пешка има значајно место во традицијата на жителите на Злетово и пошироко. На празникот Богојавление – Водици, според обичаите, во водите на Злетовска Река се капат само младоженците од изминатата година, по што капењето е дозволено и за сите заинтересирани. Токму поради ова културно и заедничко значење, вниманието на јавноста е насочено кон уредноста, безбедноста и редовното одржување на просторот, како и добивање одговор за настанувањето на ваквата ситуација.
