Министерот за локална самоуправа, Златко Перински, во емисијата „Click Plus“ на ТВ21 упати остри критики за состојбата во Град Скопје.
Тој вели дека скопјани секојдневно се сведоци на политички театар, наместо на вистинска работа и решенија за проблемите на градот.
„Она што го гледаме на дневна основа е политички циркус. Под превезот на жртва, сите скопјани станавме жртви. Со освоени 1.571 глас на парламентарни избори, се држат во заложништво 560.000 граѓани“, рече Перински во своето гостување.
Тој посочи дека Градот Скопје се соочува со сериозни системски проблеми, кои не се решаваат, туку се продлабочуваат. Притоа, додаде дека локалните избори, кои следат за неколку месеци, ќе донесат нова можност за промена и за избор на нова градска власт која ќе работи во интерес на граѓаните.
„Градоначалничката функција мора да биде оперативна. Додека се зема плата од буџетот, граѓаните имаат право да знаат што се случува. Во моментов, нема официјални информации од Град Скопје, но неофицијално, само комуналните претпријатија се во долгови од над 40 милиони евра“, истакна Перински.
Тој постави и клучно прашање до актуелното раководство: „Ако за 3,5 години не се реализираше ниту еден капитален проект, тогаш каде се парите?“
Перински заклучи дека оваа ситуација не може да продолжи, и дека скопјани заслужуваат градска власт која ќе работи транспарентно, одговорно и со визија за развој.
ИЗВОР: ТВ 21
