ИСТАНБУЛ (АА) – Палестинското Министерство за надворешни работи објави дека гласањето и повикот во израелскиот Парламент за анексија на окупираниот Западен Брег претставуваат нова објава на војна против палестинскиот народ, известува Анадолу.
Министерството за надворешни работи издаде соопштение во кое го осуди гласањето во израелскиот Парламент.
Во соопштението се нагласува дека повикот на израелскиот Парламент за анексија „е нова објава на војна против палестинскиот народ и ново лице на злосторствата на геноцид, присилно раселување и анексија“.
Се истакнува дека овој чекор на израелскиот Парламент има цел да ја ликвидира палестинската кауза и да го поткопа стратегискиот консензус на меѓународната заедница за воспоставување независна палестинска држава со Источен Ерусалим како главен град.
Во соопштението е побарано од сите амбасади и странски мисии во своите земјите да ги објаснат опасностите од повикот за анексија на Министерството за надворешни работи, центрите за донесување одлуки и јавното мислење. Од нив е побарано и да нагласат дека чекорот на анексија ги загрозува шансите за решение со две држави и регионалната и глобалната стабилност.
Во соопштението се наведува: „Државите мора веднаш да ја признаат државата Палестина и да обезбедат нејзино полноправно членство во Обединетите нации. Во исто време, мирот мора да му се наметне на Израел во согласност со меѓународното право и легитимните одлуки.“
Израелскиот Парламент вчера гласаше за резолуција со која се повикува Владата да го анектира Западниот Брег, палестински територии што ги окупираше во 1967 година.
Од 120 члена на Парламентот, 71 гласаа за резолуцијата, 13 беа против, а другите беа воздржани.
Извор: Anadolu Agency (AA)
