Вања е земена од внатрешноста на зградата, бидејќи на сите снимки кои ги гледале роднините, девојчето не ја напуштило зградата. Ова денеска го сведочеше Маја Спировска, прва братучетка на мајката Зорица Ѓорчевска.
„Гоце во еден момент го откри Цитроенот и дојде во дневна ми кажа. Рече дека имаме трага, тогаш мислевме дека ја има грабнато Панче од Велес и дека станува збор за педофил“, вели Маја Спировска.
На снимките се забележувал маж кој стоел спроти зградата, држел мобилен телефон и набљудувал. Подоцна, истиот човек бил виден како влегува во црно БМВ.
Во сведочењето беше посочено и дека таткото на Вања, кој е обвинет, на Маја ѝ рекол да бара помош од Илон Маск.
„Овој сведок го потврди тоа што ние го тврдиме а тоа е општа агонија кај таткото, Александар, секако и кај мајката. И таа агонија одела до тие граници и размислувања да му се јават на Илон Маск“, вели Туфегџиќ.
Спировска потврди дека добила информација за порака од таткото испратена во родителска група, во која пишувало: „Вратете го детето, ќе ви дадам пари.“ Сепак, таа рече дека никогаш не видела директен доказ за оваа порака.
Во текот на судењето сведочеше и Ѓорѓи Џолев, сопственик на возилото Рено Кангу, кое наводно било користено од обвинетиот Љупчо Палевски-Палчо. Џолев изјави дека во штабот на партијата имало пиштол, за кој претпоставува дека бил сопственост на Палчо.
„Палчо си го носеше пиштолот со себе ради лична безбедност. Откако тој беше нападнат пред својата куќа. Мислам дека пиштолот беше Валтер“.
Адвокатот Васко Стојков, кој го однел Палевски во Белград по извршувањето на кривичните дела, изјави дека преку него Палевски веднаш ја информирал македонската полиција дека се наоѓа во Турција.
ИЗВОР: ТВ 21
