Илјадници отпечатоци од диносауруси, кои датираат од пред неверојатни 210 милиони години, се откриени во национален парк во северна Италија, што е едно од најзначајните палеонтолошки наоди во поновата историја. Спектакуларното откритие нуди уникатен увид во животот на древните влекачи кои некогаш биле во областа, објави Би-Би-Си.
Отпечатоците, од кои некои се со дијаметар до 40 сантиметри, се распоредени во паралелни редови, а многу од нив јасно покажуваат траги од прсти и канџи. Научниците веруваат дека им припаѓаат на просауроподи – тревојадни диносауруси со долги вратови, мали глави и остри канџи.
„Никогаш не би помислил дека ќе наидам на толку спектакуларно откритие во регионот каде што живеам“, рече палеонтологот од Милано, Кристијано Дал Сасо.
Зачудувачките патеки, кои се протегаат стотици метри на вертикална планинска карпа во Националниот парк Стелвио, за прв пат биле забележани од фотограф минатиот септември. За време на тријаскиот период, пред околу 250 до 201 милион години, карпата била плимно рамниште, што подоцнежните геолошки процеси ја направиле дел од алпскиот венец.
„Ова место беше полно со диносауруси; тоа е огромно научно богатство“, рече Дал Сасо. Тој додаде дека стадата се движеле во хармонија и дека „исто така, постојат траги од посложени однесувања, како што се групи животни кои се собираат во круг, можеби заради одбрана“.
Просауроподи можеле да пораснат до 10 метри во должина и најчесто оделе на две нозе. Сепак, во некои случаи, пронајдени се отпечатоци од предните екстремитети, што укажува дека тие веројатно застанувале и се одморале со спуштање на предните екстремитети на земја.
Извор: tv21
