Грчкиот весник Етнос објави текст со наслов ,,Mицкоски: Мојата земја ќе ја нарeкувам Македонија” во кој се обвинува македонскиот премиер дека ја провоцира Грција.
-Продолжуваат провокациите од Премиерот на Северна Македонија, Христијан Мицкоски, кој повтори дека ќе ја нарекува својата земја „Македонија“, повикувајќи се на неговото „човеково право“. „Ова го претставува моето право на (слободно) изразување. Јас го кажав ова. Онаму каде што е потребно да се почитуваат Уставот и законите морам да ги почитувам. Дали ми се допаѓа или не е друга работа. Дали ми се допаѓа или не, можам да кажам на друго место. Додека ја вршам оваа функција, каде што Уставот и законот мора да се почитуваат (…) Вака стојат работите. Но, моето право на слободно изразување, правото на (слободен) говор е неотуѓиво право. И, да, го користам терминот Македонија и ќе го користам терминот Македонија, бидејќи тоа е мое човеково право и никој не може да ми го одземе“, се цитира дел од изјава на Мицкоски дадена во интервју.
Сосема на крај грчкиот весник ја пренесува и изјавата на Мицкоски за Договорот од Преспа: „Јас бев еден од оние политичари кои пред пет години кажаа дека тоа е реалност, но дека е лошо, штетно, да, пак ќе кажам.
Со идентичен наратив Мицкоски беше нападнат и од грчкиот весник Прото Тема со наслов „Мицкоски повторно предизвикува: Го користам и ќе го користам терминот Македонија, тоа е мое право“.
Со истите зборови Мицкоски го напаѓаат и телевизите „Скај“ и „Мега“.
РЕАКЦИИ ПО САМИТОТ НА НАТО
Ова не е прв случај на оркестриран напад од грчките медиуми насочен кон премиерот Мицкоски. Првите реакции од медиумите од јужниот сосед дојдоа веднаш по самитот на НАТО.
Премиерот на Северна Македонија Христијан Мицкоски, својата земја ја нарече – Македонија, а неговата влада – македонска влада, се велеше во забелешките на грчките медиуми кои излегоа со реакции веднаш по говорот на македонскиот премиер на Самитот на НАТО во Вашингтон.
Тогаш на ваквите написи претходеше и изјавата на грчкиот премиер Киријакос Мицотакис кој истакна дека е сериозно загрижен од тоа што новата влада на Северна Македонија во внатрешната комуникација сè уште се нарекува Република Македонија.
ПО ГРЧКИТЕ ВО ОРКЕСТРИРАН НАПАД И БУГАРСКИТЕ МЕДИУМИ
Што се однесува до Бугарија и бугарските медиуми, најмногу ги погоди најавата на Мицкоски дека овој месец ќе оди во Брисел да го презентира предлогот за уставни измени со одложено дејство.Македонскиот премиер има дециден став дека Македонија не може да го исполни барањето без да има гаранции дека тоа е последно барање и дека потоа нема да има нови и нови услови од Софија.
Повикан за ова се најде поранешниот амбасадот во Македонија Ангел Димитров и актуелен претсадател на бугарската комисија за историја.
Тој смета дека т.н француски предлог не е бугарски туку европски став.
ИЗВОР: kurir.mk
