БУДИМПЕШТА (АА) – Унгарските невладини организации кои добиваат средства од УСАИД поддржуваат „прашања поврзани со левичарските партии“ и финансирани се со цел да биде соборена Владата, тврдеше денес унгарскиот премиер Виктор Орбан, јавува Анадолу.
„Сега е време да се разбијат овие меѓународни мрежи, да се збришат, законски да се оневозможи нивното постоење“, изјави Орбан.
Унгарскиот премиер најави мерки против невладините организации кои добиваат пари од странство.
Тоа, како што наведе Орбан, вклучува пари и од Соединетите Американски Држави и истакна дека ги следи чекорите на американскиот претседател Доналд Трамп, кој ја прекина странската помош од САД.
Орбан рече дека невладините организации кои добиваат пари од странство, вклучително и од Соединетите Држави, треба да бидат „исчистени од земјата“, велејќи дека нивните активности се опасни. Тој тврдеше дека организациите добиваат средства од странство за да влијаат на унгарската политика.
„Сите пари што доаѓаат од САД мора да бидат јавни, а против оние што ги добиваат мора да се воведат санкции“, рече Орбан.
Унгарскиот премиер ја пофали одлуката на републиканскиот американски претседател Трамп да ги затвори сите канцеларии на американската агенција за помош УСАИД пред неколку дена, опишувајќи го потегот како „ветер за чистење“ и „торнадо на Трамп“.
Извор: Anadolu Agency (AA)
