ОН: Повеќе од половина милион луѓе во Газа се соочуваат со глад

Од светската програма за храна на ОН велат дека населението може да се соочи со „кризни нивоа на глад во следните шест месеци“, доколку војната меѓу Израел и Хамас продолжи со исто темпо и ако не се отворат границите за испорака на храна

Повеќе од половина милион луѓе во Газа се соочуваат со глад која е опасна по живот, бидејќи нема доволно храна откако изби конфликтот на таа територија, соопштија денеска Обединетите нации.

Главниот економист и директор за истражување, евалуација и мониторинг во светската програма за храна на ОН, Ариф Хусеин рече дека сега „речиси сите во Газа се гладни“.

Тој предупреди дека населението може да се соочи со „кризни нивоа на глад во следните шест месеци“, доколку војната меѓу Израел и Хамас продолжи со исто темпо и ако не се отворат границите за испорака на храна.

Во извештајот објавен денеска од невладини и агенции на ОН се наведува дека, според проценките, меѓу 24 ноември и 7 декември, речиси целото население на Појасот Газа се соочува со високи нивоа на акутен недостиг на храна, а околу 576 600 се соочуваат со глад што претставува закана за животот.

Најмалку 20 000 Палестинци се убиени од почетокот на војната меѓу Хамас и Израел, тврди Министерството за здравство во Газа

Денеска, пак, Светската здравствена организација (СЗО) соопшти дека северниот дел на Газа е остана без ниту една функционална болница поради недостиг на гориво, персонал и медицински материјали.

Како што соопшти организацијата, само девет од 36 здравствени установи се делумно функционални во цела Газа

„Сите овие објекти се концентрирани на југот на енклавата. Всушност нема повеќе функционални болници на север (од Газа)“,
изјави Ричард Пеперкорн, претставник на СЗО во Газа, преку видео врска од Ерусалим.

Според него, болницата „Ал-Ахли“ е последната болница, која е минимално функционална – се уште лекува пациенти, но не прима нови.

СЗО: Не работи ниту една болница во Северна Газа, нема доктори и не се примаат нови пациенти

Пеперкорн рече дека до пред два дена таа била единствената болница во која можеле да се оперираат повредените во северниот дел на Газа и истата била преполна со пациенти на кои им била потребна итна помош. Тој дополни дека нема повеќе операциони сали поради недостиг на горива, струја, медицински материјали и здравствени работници, меѓу кои хирурзи и други специјалисти.

Пациентите, како што додаде тој, не се во можност да се движат и треба итно да бидат префрлени за да имаат шанса да преживеат.