Клубовите од Втората македонска фудбалска лига од оваа сезона ќе се натпреваруваат без обврска за плаќање котизација, соопшти претседателот на Фудбалската федерација на Македонија, Масар Омерагиќ.
„Со оваа одлука правиме значаен чекор напред во создавање подобри услови за работа, финансиско олеснување и унапредување на натпреварувањето“, истакна Омерагиќ.
Тој додаде дека со укинувањето на котизацијата, клубовите се ослободуваат од вкупен финансиски товар од 128.000 евра по сезона, што претставува директна поддршка и зајакнување на нивната стабилност.
Ова е првпат по речиси 15 години клубовите да добијат вакво олеснување, кое ФФМ го смета за важен потег во насока на развој на фудбалот и поддршка на помалите клубови.
