Одлука на Владата: На 29 ноември администрацијата и училиштата во Скопје да работат до пладне, а 30 ноември за нив да биде неработен ден   

Овие заклучоци не се однесуваат на детските градинки и здравствените установи на подрачјето на град Скопје – кои е потребно да изработат сопствени планови за работењето, со цел непречено функционирање, информираат од Владата

На 29 ноември, државната и јавната администрација, на подрачјето на Град Скопје, ќе работи до 12 часот, а 30 ноември за нив ќе биде неработен ден. Оваа одлука, за редуцирано работно време, Владата ја донесе на денешната седница, а која е на предлог на Министерството за надворешни работи (МНР). Овој предлог на МНР, е поради 30-тиот министерски состанок на ОБСЕ, којшто ќе се одржи на 30 ноември и 1 декември 2023 година во Скопје.

„Овие заклучоци се однесуваат и на основните и средните училишта на подрачјето на град Скопје, а не се однесуваат на детските градинки и здравствените установи на подрачјето на град Скопје – коишто е потребно да изработат сопствени планови за работењето, со цел непречено функционирање“,

се наведува во соопштението од владината прес-служба.

Од Владата упатуваат препорака до општините во градот Скопје и на Град Скопје да ги спроведат заклучоците за редуцираното работно време.

Оваа препорака, се додава во соопштението, се однесува и на приватниот сектор на подрачјето на градот Скопје, посебно од подрачјето на Општината Карпош и на општините кои гравитираат кон Спортскиот центар „Борис Трајковски“ и хотелот „Александар Палас“.