Најстарата женска организација во градот – Организација на жени Битола, денеска обелодени дека во изминатите 4 години имале прекината соработка со Комисијата за еднакви можности при Советот на Општина Битола, алудирајќи на периодот кога Советот го водеше сега поранешната претседателка Габриела Илиевска.
Организацијата на жени Битола на Фејсбук објави фотографии од денешната средба со членовите на Комисијата за еднакви можности пишувајќи отворено – „Нашата цел е воспоставување на соработка која беше прекината во изминатите 4 години“ па наведува дека „По четиригодишен застој на работата повторно се отворени за соработка и стојат на располагање за сите проблеми, препораки, критики и сл.“
Соработката продолжува со претседателка Марина Крстиќ, воедно и заменик градоначалничка на Општина Битола, наведуваат од Организација на жени.
Претседателката на Организација на жени – Битола, Светлана Петковска во изјава за медиумот наведува дека во претходниот состав на Советот на Општина Битола не само што била прекината соработката со Комисијата туку и тие како Организација на жени добивале оскудна финансиска поддршка за целогодишната работа и ангажмани од Советот на Општина Битола.
„Денес Организацијата на жени на Општина Битола имаше средба со Комисијата на еднакви можности на Општина Битола со сите нејзини членови и со дел од советниците од општината кои изразија желба да бидат присутни. Состанокот го организиравме ние како членки на Организацијата на жени, а по повод нашите два проекти „Менструална правда“ и „Женските деца се деца во поделба на имотот“. Организацијата на жени покрај овие два проекти го искористи моментот да ја покаже својата работа и постоење кај сите членови на Комисијата за еднакви можности од 1944 година наваму, бидејќи во последните 4 години ние како едни од основачите на Комисијата за еднакви можности, заедно со тогашната власт и тогашните членови на Советот на Општина Битола први во Македонија направивме Комисија за еднакви можности по насоките на ЕУ.
За жал, соработката на Организација на жени Битола со Комисијата за еднакви можности во последните четири години го изгуби континуитетот. Организација на жени не знаеше зошто не бевме ни финансиски поддржани од Комисијата за еднакви можности, или во годините кога бевме поддржани, зборувам за изминатите 4 години, добивавме по 9 до 10 илјади денари за целогодишната наша работа. Денес на состанокот сето тоа се потрудивме да се надминеме со тоа што ја образложивме нашата работа и активности за општото добро на градот, жените, мажите и децата во нашата општина и пошироко во општините Могила и Новаци оти и таму често работиме, изјави Светлана Петковска, претседателка на Организација на жени Битола.
