Нов бран руски ракетни напади врз Украина, погодена критична инфраструктура во Лавов

Руската артилерија, беспилотни летала и проектили со месеци ги гаѓаат областите под украинска контрола на истокот од земјата

Руската војска во текот на ноќта извршила ракетни и напади со беспилотни летала во повеќе региони на Украина, активирајќи ги системите за противвоздушна одбрана на земјата, објавија украинските власти.

Андриј Jермак, шефот на кабинетот на украинскиот претседател Володимир Зеленски на „Телеграм“ изјави дека се погодени места на северот и западот на Украина, без да прецизира за кои станува збор, како и централните региони Днепропетровск и Кировоград.

Според Јермак, украинската противвоздушна одбрана успеала да пресретне и да собори неодреден број проектили и беспилотни летала.

На западот на Украина, шефот на регионалната воена администрација на Лавов, Максим Козицки, соопшти дека во рускиот напад во текот на ноќта била погодена „критична инфраструктурна постројка“, пренесува „Гардијан“.

„За време на воздушната тревога, погоден е критичен инфраструктурен објект во регионот Лавов. Жртви нема. Пожарот е изгаснат. Детали подоцна. Чувајте се. Не игнорирајте ги сирените“,

наведе Козицки.

Новите напади доаѓаат во време на извештаи за интензивирање на борбите во источниот дел на Украина.

Руската артилерија, беспилотни летала и проектили со месеци ги гаѓаат областите под украинска контрола на истокот од земјата.

Генералштабот на украинските вооружени сили извести дека украинските сили ги одбиле руските напади врз 15 населени места на истокот.

Регионите на Донецк и Луганск, кои заедно го сочинуваат индустрискиот регион Донбас што се граничи со Русија, се погодени од руско бомбардирање бидејќи Москва, наводно, преместува нови војници во областа.