АТИНА (АА) – Министерот за надворешни работи на Норвешка, Еспен Барт Еиде, денес изјави дека дводржавното решение може да донесе вистински мир во долгогодишниот израелско-палестински конфликт, јавува Анадолу.
Во своето обраќање на отворањето на состанокот на Глобалната алијанса за имплементација на дводржавното решение, Еиде нагласи дека прекинот на огнот во Појасот Газа, што се очекува наскоро да биде финализиран и официјално објавен, е само почеток.
„Меѓународната заедница мора да одреди како оттука да преминеме кон нешто што може да донесе вистински мир за народот на Палестина, да се оствари нивното неотуѓиво право на самоопределување, избор и водење на својата влада и држава“, изјави тој.
Состанокот во норвешката престолнина Осло е третото следствено заседание на Алијансата, која беше формирана минатиот септември, по состаноците во саудискиот главен град Ријад и во Брисел.
Конференцијата се одржува во услови на продолжена воена агресија на израелската Армија врз Газа, во која од 7 октомври 2023 година досега се убиени околу 46.600 Палестинци, главно жени и деца, и покрај резолуцијата на Советот за безбедност на ОН за итен прекин на огнот.
Меѓународниот кривичен суд во ноември издаде налози за апсење на израелскиот премиер Бенјамин Нетанјаху и неговиот поранешен министер за одбрана Јоав Галант за воени злосторства и злосторства против човештвото во Газа.
Израел, исто така, се соочува со случај за геноцид пред Меѓународниот суд на правдата поради војната во оваа енклава.
Извор: Anadolu Agency (AA)
