Британецот Ландо Норис ќе стартува од пол-позицијата на Големата награда на Австрија во Формула 1 во недела.
Возачот на Мекларен го забележа најбрзиот круг на патеката во близина на Шпилберг за 1:03.971 минути и беше значително побрз од своите конкуренти – нешто што го покажа и во квалификациите и на вториот и третиот слободен тренинг.
Во првиот ред до него на утрешниот старт ќе биде Шарл Леклер. Возачот на Ферари беше 0,521 секунди побавен од Норис, но сепак успеа да го спречи тимот на Мекларен да ги заземе првите две позиции.
Лидерот во генералниот пласман, Оскар Пјастри, остана трет. Австралискиот возач на Мекларен не можеше да го постави најбрзиот круг на крајот од квалификациите поради сообраќајот пред него и заврши 0,583 секунди зад Норис.
И во вториот ред покрај возачот на Мекларен ќе биде возач на Ферари откако Луис Хамилтон постави четврто место во квалификациите. Британецот заврши 0,611 секунди зад времето на лидерот, но успеа да го престигне минатогодишниот победник на оваа трка, Џорџ Расел (Мерцедес), кој ќе стартува петти, и светскиот шампион Макс Верстапен (Ред Бул), кој ќе биде седми. Шестото место го освои Австралиецот Лиам Лосон од Рејсинг Булс, кој заврши 0,955 секунди зад Норис.
Бразилецот Габриел Бортолето (Кик Заубер), Италијанецот Кими Антонели (Мерцедес) и Французинот Пјер Гасли (Алпин) ги комплетираа првите 10 на стартната линија.
Извор: kurir.mk
