Од март 2027 година ќе биде воспоставена директна авиолинија меѓу Дубаи и Скопје, а паралелно се водат разговори за директно поврзување на Охрид со еден од аеродромите во Обединетите Арапски Емирати, соопшти вицепремиерот и министер за транспорт Александар Николоски.
Според Николоски, линијата Дубаи–Скопје веќе е договорена, а летовите ќе ги реализира авиокомпанијата „Флајдубаи“. Новото воздушно поврзување треба да започне со новата сезона на летање, односно од март следната година.
Николоски информацијата ја соопшти во Собранието, по средбата со амбасадорот на Обединетите Арапски Емирати. Тој оцени дека директната линија ќе придонесе за поголема туристичка и деловна размена меѓу двете земји, особено во периодот надвор од главната летна сезона.
Паралелно, во тек се разговори за воспоставување директен лет меѓу Охрид и еден од аеродромите во ОАЕ. Како можни опции се споменуваат Абу Даби и Шарџа, но оваа линија сè уште не е конечна и останува предмет на преговори.
„Тоа е веќе договорено и ‘Флајдубаи’ ќе почне во март 2027 година да лета директно од Дубаи до Скопје“, изјави Николоски, додавајќи дека очекувањето е новото поврзување да придонесе за развој на туризмот.
Според министерот, договорот за воздушното поврзување е дел од пошироката соработка меѓу Македонија и ОАЕ, која опфаќа туризам, деловна размена и потенцијални инвестиции.
Николоски потсети и дека меѓу двете земји е воспоставен безвизен режим, кој според него дополнително ги олеснува патувањата и контактите меѓу граѓаните и компаниите.
