Израелскиот премиер Бенјамин Нетанјаху изјави дека се очекува неговата земја и палестинското движење Хамас „многу брзо да преминат во втората фаза од прекинот на огнот“ откако Хамас ќе ги врати останките на последниот заложник во Појасот Газа.
Нетанјаху им рече на новинарите на конференцијата со германскиот канцелар Фридрих Мерц, кој е во посета, дека втората фаза од прекинот на огнот, која вклучува разоружување на Хамас и демилитаризација на Газа, би можела да започне веќе кон крајот на месецот.
Хамас сè уште ги чува останките на Ран Гвили, 24-годишен полицаец кој беше убиен на 7 октомври 2023 година, а чие тело беше префрлено во Газа.
Втората фаза, исто така, вклучува распоредување на меѓународни сили за обезбедување на Газа, како и формирање на привремена палестинска влада која би ги водела секојдневните работи под надзор на меѓународен комитет предводен од претседателот на Соединетите Американски Држави (САД), Доналд Трамп.
Хамас тврди дека не можел да ги врати сите останки бидејќи се закопани во урнатините од израелските напади, додека Ерусалим ги обвини бунтовниците за одложување на процесот и се закани дека ќе ги продолжи нападите или ќе ја прекине хуманитарната помош доколку сите останки не бидат вратени.
Мерц рече дека Германија помага во спроведувањето на втората фаза од прекинот на огнот со испраќање офицери и дипломати во американскиот координативен центар за цивилно-воена координација во јужен Израел, како и со испраќање хуманитарна помош во Појасот Газа.
Нетанјаху рече дека малкумина веруваат дека првата фаза од прекинот на огнот е целосно остварлива, а дека втората фаза е подеднакво предизвикувачка.
„Како што му споменав на канцеларот, постои трета фаза, а тоа е дерадикализација на Газа, нешто за кое луѓето исто така веруваа дека е невозможно. Но, тоа беше направено во Германија, беше направено во Јапонија, беше направено во земјите од Заливот. Може да се направи и во Газа, но секако Хамас мора да биде расформиран“, рече тој.
Мерц рече дека Германија „секогаш ќе стои зад одбраната на постоењето и безбедноста на Израел“ по Холокаустот, додавајќи дека тоа е „дел од непроменливата суштина на односот“ меѓу двете земји.
Сепак, тој рече дека Германија сè уште верува дека решението за две држави е најдобрата опција, но дека „федералната влада останува на ставот дека признавањето на палестинска држава може да дојде само на крајот од таков процес, а не на почетокот“.
Нетанјаху рече дека иако би сакал да ја посети Германија, не планирал дипломатско патување поради потерницата издадена минатата година од Меѓународниот кривичен суд, највисокиот суд за воени злосторства на Обединетите нации.
Германија привремено го суспендираше извозот на воена опрема во Израел, кој го укина по почетокот на прекинот на огнот.
Извор: tv21
