АНКАРА (АА) — И покрај жестоките меѓународни критики, израелскиот премиер Бенјамин Нетанјаху го пофали планот на американскиот претседател Доналд Трамп за преземање на Газа, велејќи дека тоа е прва добра идеја што ја слушнал, пренесува Анадолу.
Во интервјуто за „Фокс њуз“ Нетанјаху изрази поддршка за планот на Трамп, велејќи дека со него ќе им се овозможи на „оние што сакаат да заминат од Газа, да заминат“.
„Што има лошо во тоа? Тие може да заминат, па да се вратат, може да се преселат и да се вратат. Но Газа треба да се обнови“, рече тој.
Газа е опустошена по 15 месеци жестока израелска офанзива, во која се убиени над 47.000 Палестинци. Повеќето медиуми наведуваат дека планот, всушност, подразбира присилно иселување на Палестинците од Газа.
Во вторникот Трамп изјави дека Палестинците „немаат друга алтернатива“ освен да ја напуштат Газа, велејќи дека тоа е „голем куп урнатини“ и дека тие ќе бидат преселени, а САД ќе ја преземат контролата врз Газа и ќе ја развијат во нешто „величествено“.
За контроверзниот план Нетанјаху рече: „Ова е прва добра идеја што сум ја слушнал, забележителна идеја и мислам дека треба навистина да се следи, да се разгледа и да се спроведе.“
Нетанјаху додаде дека планот „ќе создаде поинаква иднина за сите“.
Тој не прецизираше колку години ќе бидат потребни за обновување на Газа или кога луѓето би можеле да се вратат.
Нетанјаху, исто така, потврди дека Трамп не предложил САД да го финансираат планот, туку дека тоа ќе го сторат „соседни и богати држави“, без да прецизира кои држави би биле вклучени.
Во врска со можноста американски војници да бидат пратени во Газа, Нетанјаху нагласи дека Трамп не мислел на тоа војниците на САД да се борат против Хамас, истакнувајќи дека борбата против Хамас е „обврска на Израел“.
Трамп, во вторникот на прес-конференцијата заедно со Нетанјаху, изјави дека „САД ќе ја преземат контролата врз Појасот Газа“ откако Палестинците ќе бидат преселени на други места.
Трамп повеќепати предложи Палестинците од Газа да бидат примени од арапските држави од регионот, како Египет и Јордан, идеја што е одбиена и од арапските држави и од палестинските лидери.
Предлогот доби глобална осуда, вклучително и од земји од Блискиот Исток, Европа и пошироко, како Кина, Туркије, Палестина и Саудиска Арабија. Некои планот го нарекоа „етничко чистење“.
Предлогот на Трамп за преселување на Палестинците од Газа дојде по стапувањето на сила на договорот за прекин на огнот во Појасот Газа на 19 јануари, со што беше прекината израелската војна во која се убиени над 47.000 луѓе, повеќе од 111.000 се повредени и уништена е јавната инфраструктура.
Извор: Anadolu Agency (AA)
