Руските туристи би можеле да продолжат да патуваат во Европската Унија и покрај планираните санкции против туристичкиот сектор во земјата, објави денес порталот „Еуобсервер“, повикувајќи се на анонимни дипломатски извори.
Според порталот, Европската комисија планира да објави нова стратегија во врска со руските туристи што доаѓаат во Европската Унија до крајот на годината.
Според еден од дипломатите, тоа веројатно ќе биде „помек, необврзувачки документ“ во споредба со пакетите санкции на Европската Унија против Русија, пренесува ТАСС.
Постои можност Европската Унија, како дел од 19-тиот пакет санкции, да им забрани на европските туристички компании да организираат патувања во Русија, додава „Еуобсервер“.
Не е сигурно дека оваа забрана ќе биде усвоена, бидејќи во рамките на Европската Унија постојат спротивставени мислења. Некои се противат на какви било „културни забрани“, додека други сметаат дека овие мерки се премногу слаби, забележа неименуваниот европски дипломат.
Порталот „Еуобсервер“ претходно објави дека Европската Унија сака да забрани „обезбедување услуги директно поврзани со туризмот во Русија“.
Конкретните услуги за кои станува збор не беа прецизирани.
Извор: vecer.mk
