ДЕИР ЕЗ-ЗОР / ТЕЛ АБЈАД (АА) – Врз три шлепери, што преку Ирак влегоа во градот Елбукемал, во сириската област Деир ез-Зор, каде се присутни терористичките групи поддржани од Иран, изведени се напади од страна на неидентификувани беспилотни летала, известува Анадолу.
Според информациите до кои дојде дописникот на АА од извори на теренот, три шлепери синоќа преку Ирак влегле во Елбукемал.
Откако пристигнале до воената точка наречена „Имам Али“, што се користи како седиште на терористичките групи поддржани од Иран во јужниот дел на Деир ез-Зор, шлеперите биле цел на напад од страна на неидентификувани беспилотни летала.
Нема информации дали има загинати или повредени во нападот врз шлеперите.
На 30 јануари оваа година, 4 лица загинаа во нападите од страна на неидентификувани беспилотни летала врз возила на странските терористички групи поддржани од Иран во близина на градот Елбукемал.
– Иранските и странските терористички групи поддржани од Иран, интензивно се присутни во Деир ез-Зор
Познато е дека иранските и странските терористички групи поддржани од Иран во голема мерка се присутни во подрачјето на Елбукемал, Мухсан и ал-Мајадин, во источните делови на областа Деир ез-Зор.
По повлекувањето на терористичката организација ДЕАШ во ноември 2017 година, централниот и западниот дел на областа Деир ез-Зор паднаа во рацете на режимот на Асад благодарение на Русија и терористичките групи поддржани од Иран.
Странските терористички групи поддржани од Иран, кои станаа копнена сила на режимот, најмногу се присутни во областа Деир ез-Зор.
Иранските, ирачките, либанските, авганистанските и пакистанските групи со седиште во Деир ез-Зор, каде живеат Арапите сунити, се командувани од припадниците на Армијата на иранската револуционерна гарда.
Извор: www.aa.com.tr
