Кошаркарите на Денвер поведоа против Оклахома во полуфиналето од плејофот на Западната конференција во НБА лигата, откако синоќа го добија првиот натпревар на гостински терен со 121-119, а почетна предност на Истокот стекна Њујорк совладувајќи го актуелниот првак Бостон со 108-105.
Победата на кошаркарите на Денвер, кои надоместија негатива од 14 поени во второто полувреме, ја донесе тројката на Арон Гордон на четири секунди пред крајот на натпреварот, по асистенцијата на Расел Вестбрук. Претходно, на другата страна, Чет Холмгрен промаши две слободни фрлања при водство на Оклахома од 119-118.
Српскиот центар Никола Јокиќ беше најефикасниот играч на Денвер со 42 поени, 22 скокови и шест асистенции.
Вториот натпревар ќе се игра ноќта помеѓу среда и четврток, а Оклахома повторно ќе биде домаќин.
Њујорк поведе во полуфиналето на Источната конференција, совладувајќи го на гостински терен бранителот на титулата Бостон по продолжение со 108-105 и покрај негативата од 20 поени во второто полувреме.
За Њујорк ова е прва победа над Бостон по серијата од четири порази во регуларниот дел од сезоната. До победата ги предводеше Џејлен Брансон со 29 поени, пет асистенции и четири скокови
Вториот натпревар ќе се игра ноќта помеѓу среда и четврток во Бостон.
Извор: kurir.mk
