Министерството за образование и наука во соработка со УНИЦЕФ, Институтот за психологија при Филозофскиот факултет во Скопје и Комората на психолози изготвија насоки за постапување на училиштата, наставниците и родителите во услови на кризна состојба со цел да им овозможат психолошка поддршка на учениците по трагедијата во Кочани.
-Насоките имаат цел да им помогнат на училиштата да пружат психолошка поддршка на учениците по трагичниот настан во дискотеката во Кочани, во којшто згаснаа многу млади животи. Овој настан ги погоди сите и затоа е важно да покажеме колективна солидарност и да изнајдеме начини како да ги поддржиме учениците да се справат со тагата и вознемиреноста што ги чувствуваат, се наведува во Насоките што ги објави МОН.
Во насоките за училиштата, меѓу другото, пишува дека треба да се одржуваат училишните активности и да не се откажуваат часовите зашто надвор од наставата учениците ќе се препуштаат на неконтролирани влијанија од средината.
-Надвор од училиштето, тие може да бидат оставени сами без поддршка и под влијание на негативните вести што доаѓаат од медиумите. Часовите треба да се организираат на начин на кој приоритет ќе се даде на психосоцијалната поддршка на учениците. Се препорачува наставниците да ги планираат активностите во консултација со стручните соработници. За време на часовите од важност за добросостојбата на учениците е да не се одржуваат тестови, да се организираат активности кои ќе им помогнат на учениците да се чувствуваат подобро. За време на часовите наставниците да одвојат време за разговор со учениците и да им овозможат да поразговараат за несреќата доколку чувствуваат потреба. На учениците треба да им се даде можност да ги искажат своите мисли и емоции во контролирана и поддржувачка средина. На секој ученик што чувствува потреба или сака повеќе да разговара во врска со овие случувања, потребно е да се насочи кому и каде може се обрати, во и надвор од училиштето, пишува во насоките.
Во насоките наменети за наставници се даваат примери за обраќања и дискусија со учениците за време на часовите, а во насоките за родители – совети како со нивните деца да разговараат за кризната состојба со што ќе им помогнат да се справат со последици од трауматски настан.
-Ограничете го времето поминато со вести за настанот и внимавајте со информациите кои ги споделувате на социјалните мрежи. Постојаното изложување на медиумски содржини може да ги зголеми вашите и нивните грижи и стравови. Споделувањето информации може, исто така, да придонесе кон нејаснотии или ширење на непроверени податоци што може да направат штета. Придржувајте се до потврдени информации од релевантни извори. Од суштинска важност е да се работи на справување со вознемиреноста кај децата. Важно е на децата да им се укаже дека станува збор несреќен случај, кој е изолиран и не треба да се генерализира во колективна и постојана опасност, пишува во насоките за родители.
На веб-страницата на МОН се достапни насоките за училиштата, наставниците и за родителите, подготвени на сите пет јазици на кои се изведува наставата во државава.
ИЗВОР: kurir.mk
