Шукова, која е инженер технолог, е во овој ресор од 1998 година, а во моментов е на позицијата државна секретарка во Министерството за животна средина и просторно планирање
Со реконструкцијата на Владата и ротацијата на ресори поради влезот на Алијанса за Албанците, Министерството за животна средина и просторно планирање ќе му припадне на СДСМ, дознава „360 степени“. Заминува досегашниот шеф во овој ресор Насер Нуредини, кадар на ДУИ, а за нова министерка за животна средина ќе биде предложена Каја Шукова, актуелна државна секретарка во овој ресор.
Меѓу кандидатите за ова место се споменуваше Пеце Мирчевски, директор на владината Служба за општи и заеднички работи, но изборот на крајот паднал на Шукова.
Шукова во ресорот е од 1998 година во тогашното Министерство за градежништво, урбанизам и животна средина, во 1999 година работи во одделението за екоменаџмент, во 2000 г. е дел од Секторот за меѓународна соработка, истата година доаѓа во Секторот за одржлив развој, а во 2001 година е и негов раководител и на таа позиција останува до 2020 г. Потоа е назначена за државна секретарка. Таа е дипломиран инженер технолог на Технолошко–металуршкиот факултет Скопје.
Синоќа Централниот одбор на СДСМ го овласти претседателот на партијата Димитар Ковачевски да ги заокружи разговорите за окрупнување на владејачкото мнозинство и да предложи кадровски решенија за реконструкција на Владата.
Претходно, Централното претседателство на Алијанса за Албанците одлучи да биде дел од Владата. Нивниот лидер Арбен Таравари изјави дека ги добиле министерствата за правда и за здравство, вицепремиерско место (или Министерството за информатичко општество и администрација), двајца заменик-министри во Одбрана и во Земјоделство, како и неколку директорски позиции.
Потврда за другите кадровски решенија во предлогот за реконструкција на Владата се очекува во текот на денот. Изборот во Собранието на новите членови на Владата се очекува в понеделник.
ИЗВОР: 360stepeni.mk
