Кога ќе помислите на Австралија, првата асоцијација веројатно се многуте опасни животни што го населуваат тој континент. Но, најсмртоносното животно всушност не е она на што би помислиле, пишува Science Alert.
Австралија е дом на најотровните змии во светот, како и на некои од најопасните пајаци, меѓу кои се издвојува сиднејскиот пајак (*Atrax robustus*) по својот смртоносен отров.
Исто така, постојат агресивни морски крокодили, мали октоподи со сини прстени и бројни ајкули што се кријат во океанот. Сепак, ниту едно од овие животни не ја носи титулата најсмртоносно.
Изненадувачки резултати
Според извештајот на Националниот систем за смртност, животното што предизвикало најмногу смртни случаи во Австралија помеѓу 2001 и 2021 година всушност било коњот.
Во тој период, регистрирани се вкупно 713 смртни случаи поврзани со животни, што е просек од 34 годишно.
Коњите биле вклучени во дури 222 смртни случаи, или 31,1 процент, а повеќето се случиле како резултат на паѓање од коњи.
На второ место, исто така изненадувачки, се неавтохтоните видови.
Говедата се одговорни за 92 смртни случаи (12,9 проценти), од кои речиси половина се случиле во сообраќајни несреќи.
Кучињата следат со 82 смртни случаи (11,5 проценти), од кои повеќето биле предизвикани од каснувања, но значителен број биле предизвикани од падови.
Каде се автохтоните видови?
Само на четврто место е првото автохтоно австралиско животно – кенгурот. Кенгурите биле вклучени во 53 смртни случаи кај луѓето, од кои секој бил резултат на сообраќајна несреќа.
По нив следат змиите со 50 смртни случаи, пчелите со 45 (сите поради анафилактичен шок), ајкулите со 39 и крокодилите со 25 регистрирани смртни случаи во споменатиот дваесетгодишен период.
Интересно е што во тој период не е регистрирана смрт предизвикана од каснување од пајак. Последниот смртен случај од каснување од сиднејски пајак се случил во 1981 година, пред воведувањето на противотровот.
Споредба со Соединетите Американски Држави
За споредба, САД имаат просек од 267 смртни случаи поврзани со животни годишно.
Со оглед на разликата во населението – 340 милиони во САД наспроти 27,4 милиони во Австралија – бројките се релативно споредливи.
Сепак, во САД, најголемиот дел од смртните случаи (31 процент) се предизвикани од стршлени, оси и пчели.
„Други цицачи“, група што ги вклучува коњите и говедата, сочинуваат 28,6 проценти, додека кучињата се на третото место со 26,2 проценти.
Заклучокот е јасен: животните со кои поминуваме најмногу време или на кои сме најчесто алергични, претставуваат најголема опасност за човечките животи.
Извор: vecer.mk
